طالبان شرط ورود کارمندان به ادارات دولتی را داشتن ریش اعلام کرد!

طالبان به تمام کارمندان ادارات دولتی دستور داده اند که ریش بگذارند و کلاه بپوشند. برخی از شاهدان می‌گویند که طالبان شماری از کارمندان دولتی را به دلیل نداشتن کلاه و کوتاه بودن ریش اجازه ورود به ادارات دولتی نداده اند.

با گذشت هر روز محدودیت‌های طالبان بر مردم در افغانستان بیشتر می‌شود. این محدودیت‌ها بیشتر از سوی وزارت امر به معروف و نهی از منکر طالبان عملی می‌گردد.

منابع در کابل گفته اند که مسئولین امر به معروف طالبان روز دوشنبه کارمندانی را که ریش شان را تراشیده بودند، پیرهن و تنبان به تن نداشتند و یا کلاه و لنگی نپوشیده بودند، نگذاشتند وارد ادارات دولتی شوند.

یک تن از کارمندان ادارات دولتی که نخواست نامش گرفته شود، به دویچه وله گفت که طالبان امروز دوشنبه شماری از کارمندان اداره امور و وزارت امور خارجه را به دلیل نداشتن کلاه، لنگی و ریش کوتاه اجازه ورود به دفاتر شان ندادند.